Монголын хөрөнгийн зах зээл 2016 онд FTSE-ийн “Frontier market” зэрэглэлд нэр дэвшлээ
| 2015-09-17 14:53:30 |
Олон улсын хэмжээнд хөрөнгийн зах зээлийн индексийн тооцоо, судалгааны чиглэлээр тэргүүлэгч Их Британийн “FTSE Group”-ийн Засаглал, бодлого хариуцсан захирал Кристопер Вүүдсээс энэ сарын 11-нд Монголын хөрөнгийн биржийн Гүйцэтгэх захирлын үүрэг гүйцэтгэгч Д.Ангарт албан бичиг ирүүллээ.
Уг албан бичигт FTSE группийн Засаглалын зөвлөлийн есдүгээр сарын хурлаар Монголын хөрөнгийн зах зээлийг “Frontier” хөгжиж буй зэрэглэлийн “Ажиглалтын жагсаалт”–д үлдээж, энэ сард болох дараагийн ээлжит хурал буюу 2016 оны үнэлгээгээр зэрэглэл дэвшүүлж, “Frontier market” статус олгох боломжийн талаар дурдсан байна.
Монголын хөрөнгийн зах зээл цаашид зэрэглэл дэвшихийн тулд
- Үнэт цаасны Кастодианы үйлчилгээг нэвтрүүлэх,
- Үнэт цаасны төлбөр тооцоог боловсронгуй болгох,
- Хувьцааны хөрвөх чадварыг нэмэгдүүлэх,
- Үнэт цаасны зээлийн арилжааг /Short sell, Stock Lending/ нэвтрүүлэх,
- Биржийн бус арилжаа /Off-exchange transaction/, үүсмэл үнэт цаасыг зах зээлд нэвтрүүлэх зэрэг ажлуудыг хийх шаардлагатай.
Их Британийн нийслэл Лондон хотноо байрладаг “FTSE групп” нь олон улсын хэмжээнд хөрөнгийн зах зээлийн индексийн тооцоо, судалгаагаар тэргүүлэгч компани. Ная гаруй улсын хөрөнгийн зах зээлийн 250 мянга гаруй индексийг арилжааны явцад шууд болон арилжааны эцэст тооцоолж гарган, зах зээлд мэдээлдэг. Хөрөнгийн зах зээл хөгжсөн 168 орноос 76 орон тус байгууллагаар зэрэглэлээ тогтоолгосон байдаг гэж МХБ-ийн Маркетинг, олон нийттэй харилцах албанаас мэдээллээ.