НДС: ОРЛОГЫН ТӨЛӨВЛӨГӨӨГ 91.6 ХУВИАР БИЕЛҮҮЛСЭН
| 2015-10-08 10:19:06 |
Нийгмийн даатгалын санд есдүгээр сарын эцсийн байдлаар нийт 805.6 тэрбум төгрөгийн шимтгэлийн орлого төвлөрүүлж, орлогын төлөвлөгөөг 91.6 хувиар биелүүлсэн байна. Харин зарлага талдаа давхардсан
тоогоор 4 сая 60.9 мянган иргэний тэтгэвэр, тэтгэмж, төлбөр болон эрүүл мэндийн тусламж үйлчилгээний зардалд нийт нэг их наяд 111.9 тэрбум төгрөг зарцуулжээ. Ингэснээр өмнөх оны мөн үетэй харьцуулахад сангийн зардал 169.7 тэрбум төгрөгөөр өссөн үзүүлэлттэй байна. Мөн улсын төсвөөс 1995 оноос өмнө тэтгэвэр тогтоолгосон иргэдийн болон цэргийн тэтгэвэрт 165.6 тэрбум төгрөгийг тэтгэврийн даатгалын санд шилжүүлсэн талаар Нийгмийн даатгалын ерөнхий газраас мэдээллээ. Үүнээс гадна Нийгмийн даатгалын сан их хэмжээний авлагатай байгаа бөгөөд есдүгээр сарын байдлаар нийгмийн даатгалын шимтгэлийн авлага 75.6 тэрбум төгрөг байгаа аж. Нийт шимтгэлийн авлагын 92.9 хувь буюу 70.2 тэрбум төгрөгийг аж ахуйн нэгж байгууллагуудын авлага эзэлж байна. Мөн авлагын 49.1 хувийг 121 ба түүнээс дээш хоногтой хуримтлагдсан авлагын дүн эзэлж байгаа ажээ
М.Дэлгэрмаа